Forsvarsbygg stiller miljøkrav

Frå og med no må entreprenørar og underleverandørar som vil ha oppdrag hjå Forsvarsbygg, enten vere medlem i Grønt Punkt Noreg eller i ei tilsvarande ordning.

Forsvarsbygg er Noregs største eigedomsaktør, og forsvarssektoren sin eigen eigedomsekspert, som byggjer, driftar og sel eigedommar for Forsvaret.

- Me forvaltar rundt 4,5 millionar kvadratmeter bygnadsmasse fordelt på ca. 14500 bygg og anlegg landet over, me er bevisste på at verksemda vår er satt til å forvalte fellesskapet sine ressursar og me tek miljøutfordringane på alvor, seier administrerande direktør i Forsvarsbygg, Frode Sjursen.

Forsvarsbyggs kontrollmedlemskap i Grønt Punkt Noreg er eit klart signal til byggjenæringa om å støtte opp om finansieringa av returordningane. Forsvarsbygg følgjer dermed opp intensjonen i handlingsplanen til regjeringa om miljø- og samfunnsansvar i offentlege innkjøp.

- For Forsvarsbygg betyr dette at me vil stille krav til norske entreprenørar og leverandørar om at dei skal vere medlem i ei returordning for brukt emballasje. Dette sikrar at leverandørane deltek i finansieringa av dei ulike returordningane, seier Frode Sjursen.

Grønt Punkt Noreg er reiskapen næringslivet bruker for å oppfylle Noreg og EU sine krav til attvinning av brukt emballasje.

- Vår oppgåve er mellom anna å sørgje for at næringslivet deltek i finansieringa for innsamling og attvinning av brukt emballasje, seier administrerande direktør Jaana Røine i Grønt Punkt Noreg.