Jamstiller alle som byggjer studentbustader

Publisert 03.04.2013 11:25

– Det er viktig å byggje nok studentbustader. For å gjere det enklare gjev me unntak frå nokre krav til tilgjenge for alle studentbustader, seier kommunal- og regionalminister Liv Signe Navarsete.

Fram til no har berre studentsamskipnader og nokre studentbustadstiftelsar fått unntak, men frå 1. april gjeld det alle som byggjer studentbustader.

For å nytte seg av unntaket må utbyggjar garantere at bustaden skal nyttast som studentbustad i minimum 20 år. Utbyggjar må leggje fram eit tinglyst dokument før kommunen kan gje løyve til å byggje.

– Me legg ikkje opp til ytterlegare unntak frå krava til tilgjenge for ordinære bustader. Det er viktig å byggje for framtida og behovet for bustader med livsløpstandard vil auke. Sidan det i hovudsak bur unge menneske i studentbustader, meiner eg likevel det er tilstrekkeleg at berre 20 prosent av studentbustadene i kvart kompleks oppfyller alle krav til tilgjenge, seier Navarsete.