Tunnelstein blir nytta til bygging av ny gang- og sykkelveg på fylling i Sælenvatnet i Bergen. Foto: Geir Brekke/Statens vegvesen

Tunnelstein til sykkelveg

Statens vegvesen leverer no tunnelstein til ny vegfylling i Sælenvatnet i Bergen. Massane kjem frå E39 Svegatjørn–Rådal.

Det er stein frå driving av Søråstunnelen og Råtunnelen som blir frakta til gang- og sykkelveganlegget langs fv. 540 Bjørgevegen. Statens vegvesen er byggherre også for dette anlegget i Sælenvatnet.

Transporten går via fv. 556 Knappetunnelen mellom tunnelanlegget ved rv. 580 Flyplassvegen og veganlegget ved fv. 540 Bjørgevegen i Sælenvatnet.

Gang- og sykkelvegen her er finansiert i ei deling mellom Bergensprogrammet og fylkesvegbudsjettet for Hordaland.

Planen er at prosjektet E39 Svegatjørn–Rådal skal levere kring 188.000 «anbrakte» kubikk med tunnelstein i løpet av året til gang- og sykkelveganlegget.

Elles vil Bybanen utbygging i tida som kjem hente tunnelstein frå E39-deponiet i Hordnesskogen til bruk i Store Lungegårdsvann i Bergen. Bybanen utbygging informerer om dette arbeidet.