Stor interesse for å auke juletredyrking

I løpet av det siste året har det blitt stor interesse for å utvide eksisterande og etablere nye juletreplantasjer i Rogaland. Det aller meste av auken skjer på Haugalandet, i Ryfylke og i Dalane. Plantinga skjer for det meste på skogsmark, men også på dyrka jord og beiteareal, skriv Landbruksdepartementet på sine heimesider.

Mellom 20 og 30 bønder i Rogaland har til nå fått laga planar til utviding eller nyetablering av juletreplantasje. Mange av dei dyrkarane som har drive juletreproduksjon i dei siste 15 - 20 åra, ser nå at dette er ein produksjon dei vil satsa vidare på og dermed vil dei utvide.

Betydeleg auke

Auken i produksjonsarealet er betydeleg, frå 50 daa og til 250 daa på dei enkelte bruka. Etableringa vil skje over ein 10-års periode. Til denne tid i år er det planlagt nytt areal på vel 2000 daa. Dette tilsvarar ei nytilplanting på ca 1,5 millionar tre.