Klagenemnda godt i gang

- Det er eit godt tegn at fleire av sakene finn løysinga si før dei hamnar i nemnda. Det er til fordel for forbrukaren og bedrifta at ein ryddar opp i usemjene på eit tidleg stadium, seier Roger Helde, regiondirektør i Forbrukarrådet til rådets nettside.

Klagenemnda for handverkartenester på fast eigedom blei lansert 1. november 2008 og har motteke til saman 29 klagesaker og rundt 125 telefonførespurnader frå forbrukarane. Mange nytter seg også via nemnda si nettside der føresetnadene for klageretten kjem fram. På tross av dette er heile 75 prosent av alle telefonførespurnadene gjeldande bedrifter som ikkje er organiserte, og dermed ikkje kan behandlast av klagenemnda.

- Nemnda behandlar berre saker der tenesta er kjøpt av organiserte bedrifter tilknytt NHO-systemet. Klager på uorganiserte handverkare må framleis bringast inn for Forbrukarrådet, seier Frank Ivar Andersen, som er styreleiar i nemnda og dagleg leiar i Byggmesterforbundet.

Pris og manglar
Forbrukarrådet gjennomgjekk 600 spørsmål knytta til handverkartenester ved oppussing og vedlikehald i januar/februar i år. 65 prosent av sakene omhandla spørsmål knytta til usemjer om pris, og manglar, noko som også i stor grad samsvarer med sakene som er behandla i nemnda.

- Mange av tvistane ville vore unngått dersom ein hadde nytta kontraktar og blitt samde på førehand om korleis oppdraget skulle løysast og til kva pris. Men når konflikten først har oppstått, er det bra at bransjen no deltek aktivt i sjølve tvisteløysinga, seier Roger Helde.

- Klager som omfattar feil og manglar kan vere vanskeleg å vurdere, men bransjen si involvering og erfaring vil vere medverkande til at mange av desse sakene blir løyst i tråd med realitetane, seier Frank Ivar Andersen.

Utmelding av bransjeorganisasjonen.
- På bakgrunn av konkrete saker har Håndverkerklagenemnda sitt styre vedteke at bedrifta som er innklagd må vere medlem av bransjeforeininga ved det tidspunktet klaga kjem inn til sekretariatet, for at klaga kan takast opp til behandling, seier Frank Ivar Andersen.

- Det er uheldig om det er ein utveg for bedriftene som er klaga inn å melde seg ut av bransjeorganisasjonane for å unngå den interne klagehandteringa. Klagarane kan i slike tilfelle uansett sende klaga til Forbrukarrådet, seier Roger Helde.

Etter at kunde, bedrift og adresse i den einskilde saka er anonymisert vil vedtaka i nemnda bli gjort offentlege på heimesidene til nemnda.