Dette er planen for nye Gol stasjon - kan stå klar i 2023

Gol stasjon på Bergensbanen skal få ei ansiktsløfting. Med planfri kryssing av sporet og universell utforming vert stasjonen sikrare og lettare tilgjengeleg for alle, skriv Bane Nor i ein melding.

– Me er godt i gang med planlegginga og kan no vise dei første skissene av «nye» Gol stasjon. Dei gir eit inntrykk av korleis området kan verte sjåande ut når planovergangen er fjerna og ny overgangsbru er på plass, seier prosjektleiar Ronny Winther i Bane NOR.

– Når planovergangen vert fjerna, kan me redusere ventetida når to tog møter kvarandre. Det gjer både gods- og persontrafikken meir effektiv, samstundes som området vert sikrare og lettare tilgjengeleg for dei reisande, fortsett prosjektleiaren.

Planlegginga starta i 2019, og ein teknisk detaljplan skal vere klar hausten 2020. Denne vert så sendt vidare til Jernbanedirektoratet for ei avgjerd om investering før bygginga kan starte.

Prosjektet er planlagd ferdig i 2023. Framdrifta avheng av ei investeringsavgjerd innan utgangen av 2020, ifølge Bane NOR.

– Me har god dialog med Gol kommune og opplever at dei ønskjer prosjektet velkomen. Eg håpar at planane også fell i smak hos naboane og dei reisande, seier Ronny Winther.

Den nye overgangsbrua som knyter spor ein og to saman kjem om lag 30 meter vest for stasjonsbygninga. Brua får både trapper og heis og vert rundt 12 meter høg til toppen av heishuset. Ved spor to kjem eit nytt venterom som erstatning for dagens leskur. I tillegg vert publikumsområda fornya til universell utforming med nytt informasjonsanlegg (skjermar, skilt og høgtalaranlegg), utemøblar og belysning.