Rassikring i Fatlaberget startar i haust

- Anleggsarbeidet med rassikring i Fatlaberget skal ta til i haust, og ein ny veg gjennom dette utsette området skal opnast for trafikk sommaren 2008. Med den nye vegen blir trafikken tryggare, og det blir færre vegstengingar på grunn av ras eller rasfare.

Dette seier samferdselsminister Liv Signe Navarsete i samband med at det i statsråd er gjort framlegg om utbygging og finansiering av eit rassikringsprosjekt på riksveg 55 ved Fatlaberget i Leikanger og Sogndal kommunar i Sogn og Fjordane. Prosjektet omfattar bygging av om lag 3,2 kilometer ny veg, medrekna ein 2,3 kilometer lang tunnel gjennom rasområdet og bygging av ei mindre bru over Fatlaelvi. Prosjektet er rekna å kost i alt 163 millionar kroner. Utbygginga skal finansierast ved hjelp av bompengar og løyvingar over statsbudsjettet. - Strekninga mellom Leikanger og Sogndal er viktig for lokaltrafikken og for gjennomgangstrafikken langs nordsida av Sognefjorden. Prosjektet vil føre til at Leikanger og Sogndal kan utviklast vidare som eit felles bu- og arbeidsmarknadsområde, seier samferdselsminister Liv Signe Navarsete.