På landsmøtet for Fair Play Bygg Norge i Trondheim 6. mai 2024 er Audun Otterstad valt som ny styreleiar for organisasjonen. Otterstad er i dag direktør i EBA Trøndelag og styremedlem i Byggebransjens Uropatrulje.
– Eg gler meg til å ta fatt på denne oppgåva. Byggjenæringa er i all hovudsak ei næring prega av seriøse bedrifter som tar ansvar for dei tilsette, samstundes har Fair Play Bygg Norge vist at arbeidslivskriminalitet er eit betydeleg samfunnsproblem, seier Audun Otterstad i ei pressemelding frå Fair Play Bygg.
Silje Skullerud går av som styreleiar i Fair Play Bygg Norge, men held fram i styret.
– Det har vore inspirerande og lærerikt å vera styreleiar i Fair Play Bygg. Eg held fram i styret og ønskjer å bidra med min kompetanse i det viktige arbeidet som skjer i Fair Play Bygg, seier Silje Skullerud i meldinga.
Ho peikar på at organisasjonen har fått stort gjennomslag med relativt få ressursar.
– Det er ein liten organisasjon men svært dedikerte og dyktige medarbeidarar. Fair Play Bygg har vist at a-krim er eit problem som spreier seg. Byggvarebedrageria omtalt i Bygg.no og DN.no er eksempel på dette. Når problemet breier om seg er det også naudsyn at fleire engasjerer seg for å førebyggje a-krim, sier ho.
Fair Play Bygg Norge er ein paraplyorganisasjon for regionale organisasjonar som arbeider mot arbeidslivskriminalitet (a-krim) i Noreg. Dei regionale organisasjonane dekker 8 fylke og sendte 846 varsel om a-krim i 2023 til ulike offentlege etatar.
Organisasjonen vart stifta i 2020 og har i dag desse medlemmane:
- Byggebransjens Uropatrulje
- Fair Play Bygg Oslo og omegn
- Fair Play Agder
- Fair Play Bygg Rogalan
- Fair Play Bygg og Anlegg Vestland
- Fair Play Bygg og Anlegg Nordland
Til informasjon er EBA eigar av Bygg og Anlegg Media AS som er utgjevar av Byggeindustrien/bygg.no.