Avslår søknad om bygging av minikraftverk

Publisert 09.02.2006 08:00

NVE har gjort vedtak om å avslå søknaden om bygging av Lonefossen minikraftverk i Åsedøla, som er ei sideelv til det verna Naustavassdraget i Sogn og Fjordane. Årsaka er at minikraftverket ville ta bort så mykje vatn at det forringar verneverdiane.

Minikraftverket er planlagt med ei makismal slukeevne tilsvarande middelvassføringa, og det vert søkt om å ta i bruk alminneleg lågvassføring. NVE meinar minikraftverket vil ta bort så stor del av vatnet i elva at det endrar dei naturlege variasjonane i vassføringa og medfører uakseptable verknader for naturmiljøet og landskapsbiletet. Det er lagt vekt på dei store type- og referanseverdiane i Naustavassdraget, og NVE vurderer omsøkte minikraftverk til å svekke naturverdiane som er lagt til grunn for vernet. Søknaden er avslegen med direkte heimel i vassressurslova utan nærmare handsaming.