Transnova - til Trondheim

Miljøprosjektet Transnova skal leggjast til Teknologiavdelinga til Statens vegvesen Vegdirektoratet i Trondheim. Forslaget til mandat til Transnova vart óg presentert i dag.

Redusere klimautslepp frå transportsektoren
Vegdirektoratet skal på oppdrag frå Samferdselsdepartementet administrere prosjektet, som skal utvikle verkemiddel og tiltak for å redusere klimautslepp og anna miljøforureining frå transportsektoren. For neste år er det lagt opp til at det over statsbudsjettet skal brukast 50 millionar kroner til Transnova, i tråd med Klimaforliket.

Økonomisk stønad til miljøprosjekt
- Transnova skal vere eit "Enova for transportsektoren" og skal gi økonomisk stønad til gode miljøprosjekt. Prosjekt som framskundar auka bruk av alternative drivstoff, slik som annangenerasjons biodrivstoff, elektrisitet og hydrogen, vil bli prioritert. Transnova skal fremje fleire gode løysningar på miljøproblema innan transportsektoren, seier samferdselsministeren.

Står for ein firedel av utsleppa
Regjeringa meiner det er naudsynt å få klimagassutsleppa frå transportsektoren ned. Frå 1990 til 2005 auka CO2-utsleppa frå vegtransporten med over 25 prosent, og utsleppa frå veg står no for ein firedel av dei nasjonale utsleppa. Folk og næringsliv rundt i landet treng transport óg i framtida, og då er det viktig at drivstoffet som køyretøya nyttar gir låge eller ingen utslepp. Det er ei oppgåve for det nye Transnova.

Transnova skal minst disponere 50 millionar kroner kvart år i tre år. Målet er at prosjektet skal bli ei permanent ordning når den treårige prøveperioden er over.