Det er klargjering til den siste av dei store støypejobbane i prosjektet i desse dagar. Det skjer i Rådal, der det tysdag 16. juli skal støypast siste takdekket på tunnelportalen i sørgåande retning, skriv Statens vegvesen i ei pressemelding.
25. juni støypte mannskapa tilsvarande dekke på nordgåande portalen. I vekene etter har ein jobba med armering til dekke på sørgåande portal for Råtunnelen i Rådal.
Når støypinga er i gang må arbeidet halde fram kontinuerleg – heilt til jobben er gjort. Planen er å ta til med betonglevering kl. 06.00 om morgonen.
Det er venta at jobben vil pågå i kring 20 timar.
Deretter skal betongen herdast, før mannskapa kan ta ein velfortent ferie, på slutten av veke 29.
Også i Lyshorntunnelen pågår det framleis noko arbeid før entreprenøren kan ta sommarferie. Denne veka er det innreiingsarbeid, medan det i veke 29 skal gjerast noko betongarbeid i tverrslaga inne i tunnelen.
- Nøkkelord
- Statens vegvesen
- Anlegg