Her vil Statens vegvesen bygga forbikøyringsfelt og kjettingplassar

Målet med planen er å regulera areal for å bygga forbikøyringsfelt og kjettingplassar langs rv. 5 mellom Kjøsnestunnelen i Sunnfjord kommune og Fjærlandstunnelen i Sogndal kommune, heiter det i ei melding frå etaten.

Strekninga har ei lengd på om lag to kilometer og stigning på opp mot åtte prosent. Den bratte stigninga fører til at spesielt tyngre køyretøy mister fart og det oppstår trafikale problem, spesielt vinterstid.

Statens vegvesen vurderer at deira planlagde utbetringar gir betre trafikktryggleik og vesentleg betre framkomst på strekninga.

Parallelt med dette blir det jobba med planar for å realisera Jostedalsbreen Glacier Gondol.

– Statens vegvesen og Jostedalsbreen AS har hatt godt samarbeid for å prøva og samordna planane. Gjennom dette arbeidet viste det seg mest hensiktsmessig for begge partar å jobba med planane kvar for seg. Statens vegvesen sine planar for rv.5 Lunde - Lundebotn er mogleg å kombinera med bygging av gondolprosjektet, skriv Vegvesenet.

– Vår plan legg opp til at rasvoll på nordsida av rv.5 må forlengast. Truleg må denne flyttast og/eller forlengast endå meir ved ei framtidig bygging av botnstasjon for gondolanlegg. Dette er løysbart, og våre planar vil ikkje vera til hinder for bygging av gondol, seier seksjonssjef Tone Anette Espe i Statens vegvesen.