Hæhre godt i gang ved Kjøsnesfjorden, men korona skaper utfordringar

– Entreprenøren starta arbeidet rundt årsskiftet, og dei er i rute med arbeida. Hæhre driv no tunnel frå tre stuffar, og det er med på å sikre framdrifta, seier prosjektleiar Svein Reidar Dale i Statens vegvesen, i ein pressemelding.

Statens vegvesen presiserer at situasjonen per no for veganlegget rv. 5 Kjøsnestunnelen er at drifta er noko redusert denne veka grunna smitteverntiltak etter korona-utbrotet.

-Me retter oss etter råd frå nasjonale myndigheiter og Sunnfjord kommune. Mellom anna sit alle som kan i vår byggherreorganisasjon på heimekontor, og fysiske møter blir erstatta med møter på Skype. Det er sjølvsagt utfordrande for entreprenøren å halde hjula i gang når nokre av anleggsfolka jobbar skift på tvers av fylkesgrensene, og me tilpassar oss så godt me kan, seier Dale.

8,5 kilometer tunnel

Den eksisterande Støylsnestunnelen på cirka 2 kilometer skal forlengjast til å bli ein tunnel på totalt 8,5 kilometer. Prosjektet blir bygd for rassikringsmidlar og har ei styringsramme på 1,2 milliardar kroner. Det omfattar også nytt elektrisk utstyr i heile lengda på tunnelen. Den nye Kjøsnestunnelen bli den lengste tunnelen på strekninga mellom Sogndal og Førde i Vestland fylke, der Fjærlandstunnelen (6,4 kilometer) og Frudalstunnelen (6,8 kilometer) frå før er lange tunnelar, står det i meldinga.

Såg strekningar i samanheng

Arbeidet med forlenging av tunnelen starta alt for tre år sidan, då entreprenøren Implenia sprengte ut 3 kilometer av tunnelen for å levere steinmassar til bygging av ny E39 mellom Bjørset og Skei.

– Samvirket mellom dei to prosjekta har vore særs fruktbart, og det har nok spart samfunnet for både pengar og ulempe med store deponi, seier prosjektleiar Dale, som er Vegvesenet sin leiar på begge prosjekta.

Ein del av masseoverskotet frå dei 6,5 kilometrane med ny Kjøsnestunnel ligg altså allereie godt utnytta som fundament for ny E39 mellom Skei og Førde. Tunnelmassane som no blir køyrde ut frå fjellet blir mellom anna nytta til bygging av skogsveg, skredvoll og utfylling av ny rasteplass i Kjøsnesfjorden. Foreløpige berekningar viser at gjennomslag i begge endar vil skje mot slutten av 2020.

Skal koplast saman

Det mest utfordrande punktet i prosjektet er samankoplinga av ny og gamal tunnel. Når det arbeidet startar, vil det bli ein del heft for trafikkantane.

– Me får eit stort spenn i taket der gamal tunnel skal strossast ut. Det blir opp mot 27 meter breitt på det meste der dei to tunnelane skal koplast saman, og det må boltast mykje i hvelvinga der, seier byggeleiar Sverre Kjos-Wenjum i Statens vegvesen.

Mogleg nattestengingar etter 17. mai

Det blir vurdert om boltesikring og kanskje utstrossing i den trafikkerte tunnelen vil starte rett etter 17. mai. Då vil det bli nattestengingar med høve til gjennomkøyring midt på natta.

– Me vil kome nærmare tilbake med informasjon om når det blir strossing i Støylsnestunnelen når mai nærmar seg. Då veit me meir om framdrifta på anlegget, og i kva tidsrom det er best å få denne jobben gjort, seier prosjektleiar Svein Reidar Dale.

Rv. 5 langs Kjøsnesfjorden er også ein særs viktig strekning for beredskap i tidlegare Sogn og Fjordane fylke, då vegen er raskaste framkomst frå Indre Sogn til sjukehuset i Førde.

– Me er difor alt no i dialog med naudetatane, for å sikre at beredskapen blir ivaretatt når me får arbeid i den trafikkerte tunnelen, seier Dale.

Rv. 5 Støylsnestunnelen blir bygd av Hæhre entreprenør i ein totalentreprise. Multiconsult er entreprenøren sin rådgjevar og prosjekteringsansvarlege, medan TrafTec skal gjere elektroarbeidet når den tid kjem, melder Statens vegvesen.