Sauebonden frå Evenesdal i Saltdal i Nordland må i dag møte i Salten tingrett, tiltalt for miljøkriminalitet, skriv NRK Nordland.
Kvinna vedgår at ho i fjor haust felte furua med kongeørnreiret som sto på hennar eigen grunn, men nektar for å ha gjort noko straffbart.
– Ho har innrømma å ha felt treet, men ho ville berre bruke furua til material i fjøsen sin. Ho visste at kongeørna var freda, men oppfatta at reiret var tomt, seier kvinna sin advokat, Torkel Johnsen, til nrk.no.
Ifølgje Fjelltjenesten hadde eit kongeørn-par hatt reir i furua i seks år. Kongeørna har vore freda i Noreg sidan 1968, og er framleis ein trua art. Difor slo Fjelltjenesten alarm då dei i sommar, under sin årlege kontroll i dalen, oppdaga at furua var felt.
Ifølgje Fjelltjenesten vart treet felt allereie hausten 2012, men først i sommar skal det ha blitt frakta bort.
Les også: Risikerer fengsel etter trehogst
Les også: Her er restane etter ørneredet
Politiet sikta kvinna for å ha felt treet med ørnereiret, og Statsadvokatane ved Økokrim tok ut tiltale for brot på Naturmangfaldslova.