Store investeringer i Ås

Dette vil gje ei samla og integrert verksemd og gjere Ås-miljøet til det nasjonale senteret for biologiske og naturvitskaplege fag, seier landbruks- og matminister Lars Sponheim. - Naturvitskapelege kunnskapar blir tatt i bruk på stadig nye fag- og samfunnsområde. Det er derfor viktig at dei tunge fagmiljøa som UMB og NVH representerer samlar kreftene. På Ås kan dei også inngå i eit tett samvirke med dei mange andre relevante forskningsinstitusjonane på dette feltet som ligg her. Med dette vil Ås-miljøet ha føresetnader for å bli leiande på dette feltet både nasjonalt og internasjonalt, seier Sponheim. Ei samlokalisering på Ås vil krevje store investeringar i bygg og annan infrastruktur. Utdannings- og forskningsdepartementet vil derfor foreta ei samla vurdering av kostnadene. Storleiken på dette prosjektet krev at det blir gjennomført ei grundig kvalitetssikring før endelig konklusjon om organisering og lokalisering blir trekt. Den videre oppfølgjinga av saka vil bli lagt fram for Stortinget. Det er føresetnaden at Norges veterinærhøgskole og Veterinærinstituttet si verksemd i Rogaland skal halde fram ved ei eventuell samorganisering og flytting til Ås. Ei arbeidsgruppe (Norum-komiteen) som vurderte organisering av NVH og NLH og etablering av tilfredstillande fasiliteter undervisning i veterinærmedisin la fram sin rapport i 2003. Komiteen gjekk samrøystes inn for å slå saman NVH og NLH. Dei såg det som ein føresetnad at NVH og Veterinærinstituttet må vere fysisk samla. Komiteen vurderte eit organisatorisk samarbeid mellom NVH og Universitetet i Oslo som mindre aktuelt. Eit internasjonalt fagpanel nedsett av Norges forskningsråd har vurdert at både samanslåing og samlokalisering av NVH på Ås, og samanslåing av NVH og Universitetet i Oslo er fagleg forsvarleg, og at eit val er avhengig av kva for visjon ein har for veterinærfagets framtid. Fagpanelet ga ingen klare konklusjonar, men fleirtalet meinte at ei samanslåing med Universitetet i Oslo vil vere det beste alternativet.