Bremanger 2 i rute til opning

- Me ligg i rute til sluttfristane i slutten av mai. No er entreprenøren i gang med asfaltlegging på parsellen Kolset-Bortnen, og på parsellen Borten-Sørdalsvatnet er Mesta Elektro AS i full gang med å montere kabelbru, lysarmatur og trekke kablar i den lange tunnelen, seier byggjeleiar Arne B. Strand i Statens vegvesen til vegvesen.no.

Store deler av Bremangersambandet 2 har no fått på det første asfaltlaget, men ein god del vegarbeid ute i dagen står att langs fjorden inn til Bortnen og i Sørdalen.

- Me håpar å få lagt asfalt på Sørdal-sida av anlegget i slutten av oktober, seier prosjektleiar Susanne Svardal.

Totalt består Bremangersambandet 2 av rundt 7 km veg i dagen og to tunnelar: ein på 4,8 km og ein på 200 meter. Det har vore mykje sprengingsarbeid for å få utvida vegbana tilstrekkeleg, og cirka 55.000 kubikk stein er sprengt ut.

Mellom Leirgulen og Bortnen jobbar hovudentreprenør K.A. Aurstad AS med å byggje ny vegbane, legge kabel i grøft og byggje gang- og sykkelveg. På strekninga Bortnen-Sørdalen er Mesta Entreprenør AS hovudentreprenør, med Havnen Entreprenør AS som underentreprenør.

- Når vegen opnar på forsommaren, blir forbindelsen mellom kommunesenteret Svelgen og dei nordlige delane av Bremanger mykje lettare, seier Susanne Svardal.

Undervegs har det vist seg at Bremangersambandet 2 blir mykje rimelegare å byggje ut enn Vegvesenet først venta. Første prisoverslag var på var 685 millionar 2010-kroner, ved oppstart hadde prosjektet gått ned til 537 millionar kroner, og etter eit overslag i fjor haust vart totalprisen sett ned til 515 millionar. Etter nytt overslag i sommar vart prisen nedjustert til 504 millionar målt i kroneverdien i 2012.