Første salve i Agjeldtunnelen

Det var ordførar Sven Flo i Stryn kommune som fekk æra av fyre av den første salva. I førevegen hadde NCC Construction AS sikra med boltar og sprutbetong ved tunnelpåhogget, og første salva hadde delt tverrsnitt og halv salvelengde (2,5 m), for å unngå oppsprekking av fjell i starten av tunnelen, melder vegvesen.no.

Framover vil det bli meir aktivitet langs eksisterande veg, og NCC vil ha ca. 25 arbeidarar på anlegget.

Arbeidstider i tunnelen og massetransport er måndag – torsdag 06:00-02:00, fredag 06:00 – 22:00 og laurdag 06:00 – 16:00. Arbeid i dagen vil vere måndag til torsdag 07.00 – 19:00.

I perioden framover må trafikantar påberekne seg ventetid inntil ein halv time, i tillegg vil massetransport langs eksisterande veg auke når tunneldriving og veg i dagen er i full drift.

Det er planlagt at anleggsarbeidet skal bli utført til minst mogleg hinder for trafikantane, og Statens vegvesen oppmodar folk på vegen til å vere oppmerksame, ta omsyn til arbeidsvarsling og anleggsarbeidarane som utfører arbeidet.

- Dei er på vegen for dykk, seier prosjektleiar Jon Harald Huseklepp i Statens vegvesen.

Tunneldrivinga skal etter planen vere ferdig våren 2013, og etter det vil NCC starte arbeid med portalar, vegbane og andre installasjonar i tunnelen, som skal vere klar til oppstart av elektrokontrakt seinhaust 2013.

Tunnelen blir driven frå vest mot aust (mot Ugla). Arbeid med sikring av området i austre tunnelpåhogg er starta.