Medan arbeidet pågår inne i tunnelen, vert trafikken leia i kolonne om den spektakulære gamlevegen i Austmannalia, melder vegvesen.no.
Hausten 2009 knuste eit stort steinras deler av den nedste portalen på Austmannalitunnelen, og tunnelen vart tidvis stengd i fleire månader. Samstundes med at området rundt tunnelmunningen vart sikra, vart det også utført arbeid inne i tunnelen, mellom anna fjellsikring, ny vass- og frostsikring.
No er det det elektriske anlegget og sikringsutstyret som treng ei oppgradering.
- Det skal installerast nytt lyssystem, naudskap, radioutstyr og vifter. Nytt naudutstyr skal sikre l overvaking av tunnelen. Om eit uhell skulle oppstå inne i tunnelen kan ein gi beskjed direkte til Vegtrafikksentralen(VTS) via naudtelefonane , fortel byggjeleiar Olav Svendsen.
Austmannalitunnelen vert også nytta til oppstilling for kolonnekøyring om vinteren. For dei som må vente i kø for å komme over fjellet er det nok ekstra kjekt at det no kjem eit nytt toalettbygg inne i tunnelen.
For nokre ekstra lange køyrety kan det by på problem å komme seg igjennom dei bratte svingane i Austmannalia.
- Spesialtransport vil få løyve til å køyre gjennom tunnelen med ledebil. Ved eventuelt problem i omkøyringsvegen vil trafikken bli leia gjennom tunnelen, seier Svendsen.
Arbeidet i tunnelen vil gå fram til desember i år.
- Nøkkelord
- Statens vegvesen
- Anlegg