Spinnearbeidet tok til 7. november 2011. Det gjekk drøye sju månader før ein var halvvegs. Årsaka var dels jule-besøket av Dagmar på Vestlandet, som ga ein vinterpause i arbeidet. Men andre halvparten av kabelspinninga har gått radig, slik at entreprenpør MTHøjgaard ser ut til å få gjort andre halvparten av kabel-jobben på berre to månader, skriv Statens vegvesen på sine nettsider.
Kompaktering av kablane
Når spinnemaskina stilner på Bu er det klart for kompaktering – eller samanpressing – av dei 38 delkablane til to buntar, med 19 delkablar i kvar bunt. Det er tre kompakteringsmaskiner som skal brukast til denne oppgåva. Maskinene blir løfta opp i brutårna, og kompaktering vil pågå både i sidespennet og hovudspennet på båe kablane.
Hengestengar
Når kabelen er kompaktert i to runde buntar, skal det monterast kabelklemmar og hengestangsfeste. Dette er delar som også blir løfta opp i brutårna, og frakta ut i spennet med taubane. Det skal monterast hengestangsfeste til kvar av dei 130 hengestengane.
Montering av hengestengar er neste operasjon. Dei aller fleste stengane er leverte i tromlar eller kveil frå Frankrike. Stengane skal heisast direkte opp frå ei arbeidsferje som seglar på fjorden under bruspennet. Hengestengane blir monterte i hengestangsfesta på kablane.
Ferdiggjeringa av brukablane – med avsluttande montasje av hengestengar – vil pågå i kring to månader, heile august og det meste av september.
Når vi skriv oktober vil skipet med dei 23 stålkasse-seksjonane vera på plass i Hardanger, og bli heiste opp og festa i hengestengane ein for ein i løpet av ein månads tid.
- Nøkkelord
- Statens vegvesen
- Anlegg