Siste veg-etappe mot Hardangerbrua

Publisert 18.04.2012 10:05

Statens vegvesen har skrive kontrakt for bygging av tredje og siste etappe av ny rv. 13 mellom Brimnes og Hardangerbrua på Bu, skriv vegvesen.no.

- Hakk i plata, sa ein munter og nøgd Eivind Opedal i Opedal & Sønner AS då han signerte avtalen. Hardanger-entreprenøren har tidlegare bygt 1. byggjesteg (opna sommaren 2010) og er no i full gang med 2. byggjesteg, som skal vera ferdig i november 2012. Det har vore god konkurranse om alle dei tre entreprisane.

Byggjestart

Neste veke blir det byggjestart på tredje økta mellom Brimnes og Bu. Skogrydding kjem først, deretter vegbygging gjennom skog og over djupe myra. Vegarbeidet startar om lag midtvegs på den 1,9 km lange strekninga.
Det skal lagast to omkøyringsvegar i byggjeperioden i samband med masseutskifting over myrområdet. Men det blir fast dekke på omkøyringane, slik at trafikken kan passera her fram til ei delopning av ny vegline, som skal skje i løpet av april 2013.
Heile entreprisen for byggjesteg 3 skal vera ferdig til oktober 2013.