Veikontorenes plassering avgjort

Samferdsledepartementet har no avgjort plasseringa av Statens vegvesen sine nye regionkontor det vil seie Lillehammer, Arendal, Leikanger, Molde og Bodø. - Det tar eg sjølvsagt til etterretning, seier vegdirektør Søfteland

- Oppgåva blir no å gjennomføre departementet sitt vedtak. Mi oppgåve som leiar av fagetaten er å gi råd til overordna styresmakter. Det har eg gjort i denne saka. Eg rådde til at regionkontora skulle plasserast i Oslo, Skien, Bergen, Trondheim og Tromsø. Eg tok utgangspunkt i gitte kriterium og det som samla sett var mest effektivt, - mellom anna nærleik til oppgåvene, kommunikasjonar internt i regionane og i høve til hovudstaden. Desentraliseringa, som etter mi meining er særs viktig, meinte eg var oppfyllt gjennom opprettinga av 30 distriktskontor og det nye styringssystemet, seier vegdirektøren. - Det har vore stor semje i Statens vegvesen om omstillinga av etaten. Sjølv om dei tilsette ved dei einskilte vegkontora har ønskt at regionkontoret skulle kome til deira fylke, trur eg dei fleste har hatt forståing for det framlegget til plassering av regionkontora som eg la fram. No er avgjerda teke. Det er korkje tid for hovmod eller pessimisme. Vi må gjere alt vi kan for å få eit mest mogeleg effektivt vegvesen med dei rammevilkåra som er vedtekne, seier Søfteland.