Auka innsats for trafikktryggleik

- Vi ser positive resultat av arbeidet for trafikktryggleik. Innsatsen vert no ytterlegare styrkt, seier samferdselsminister Magnhild Meltveit Kleppa.

Eit foreslått tilleggsbeløp på 70 millionar kroner til Statens vegvesen går til investeringar for å betra tryggleiken. Det er fordelt slik:

* 30 millionar kroner til bygging av midtrekkverk på E18 i Aust-Agder, slik at det vedtekne midtrekkverkprosjektet Frivold – Bie kan forlengast til Temse. Det blir dessutan lagt opp til å byggja midtrekkverk på E39 ved Try i Vest-Agder.

* 20 millionar kroner til vidareføring av arbeidet med belysning av E39 på strekninga Vest-Agder grense – Ålgård i Rogaland.

* 12 millionar kroner til betre lys i fire tunnelar på E39 i Vest-Agder.

* 8 millionar kroner til utbetring av tre ulykkesutsette kurvar på E39 ved Skolandssvingen i Lyngdal i Vest-Agder.

Over budsjettet til Helse- og omsorgsdepartementet er det dessutan foreslått ei tilleggsløyving på 21,3 millionar kroner til Nasjonalt folkehelseinstitutt. Pengane skal brukast til utstyr for å fastsetja ”påverknadsgraden” ved køyring med andre rusmiddel enn alkohol.

- Utstyret legg til rette for å setja i verk viktige lovendringar som gjeld køyring under påverknad av andre rusmiddel enn alkohol, seier Magnhild Meltveit Kleppa.

E8 Lavangsdalen i Troms

Det har vore fleire ulukker på E8 i Lavangsdalen i Troms i dei siste åra. Etter den tragiske ulukka tidlegare i år blei det laga ein rapport. Denne inneheld forslag til kortsiktige og langsiktige tiltak for å gjera trafikken på strekninga tryggare. Forslaget til kortsiktige tiltak er på i alt 35 millionar kroner. Desse tiltaka skal ta til i år, ved omprioritering innanfor budsjettposten ”Riksveginvesteringar”.

Forslaget til tilleggsløyving på 160 millionar kroner til Statens vegvesen omfattar elles:

* 40 millionar kroner til planlegging - for å følgja opp prosjekt som skal gjennomførast i tråd med Nasjonal transportplan 2010-2019. Midlane skal også nytast til kvalitetssikring og utgreiingar i samband med førebuing til Nasjonal transportplan 2014-2023.

* 20 millionar kroner til å dekkja eingongskostnader i samband med gjennomføring av prosjektet ”Nasjonalt ferjekort/samordna billettering for riksvegferjer”.

* 30 millionar kroner til sluttoppgjer med Agder OPS Vegselskap for prosjektet E18 Grimstad - Kristiansand.

Reknar ein med tilleggsforslag som no er lagde fram, vil det over statsbudsjettet for 2011 vera løyvd i alt om lag 15,2 milliardar kroner til vegformål.