Tilskot til 103 nye omsorgsbustader i Hordaland

Rundskriv IS-5/2004 frå Sosial- og helsedirektoratet inneheld kvotar for tildeling av støtte for 2004 til omsorgsbustader knytt til opptrappingsplanen for psykisk helse. Kommunane sin frist for å søkje om tilskot var 1. september. Husbanken har motteke søknadar frå 14 kommunar som har søkt om støtte til 118 nye bustader. 2004 er det siste året Husbanken gjev støtte til slike bustader. I løpet av dei fem åra opptrappingsplanen har eksistert, har Hordaland fått tilskot til 350 bustader totalt. For dette siste året blir det gjeve tilsagn om stønad til 103 bustader. Fylkesmannen og Husbanken reknar med at alle søkjarane vil få svar innan utgangen av oktober.