Fylkesgaranti til Austevollbrua

Fylkestinget har vedteke at fylkeskommunen skal kjøpa 1020 aksjar i AS Austevoll bruselskap for å ha fleirtal i styret i selskapet. Rv 546 Austevollsbrua er eit prosjekt som går ut på å få vegsamband mellom øyane Huftarøy og Hundvåkøy i Austevoll kommune. Prosjektet omfattar bygging av om lag 3,8 km ny veg der det skal byggjast 3 bruer. Bruene er på 430 m, 410 m og 40 m. Kostnadsoverslaget er på 303 mill 2004-kroner. Uvissa i overslaget er vurdert å liggja innanfor pluss/minus 10 %. Det er lagt til grunn følgjande finansieringsplan for bygging av Austvollsbrua: Innspart tilskot til drift av ferjesambandet 158,0 mill. kr, tilskot 79,2 mill. kr, bompengar 65,8 mill. kr. AS Austevoll Bruselskap har søkt om fylkeskommunal garanti for lån selskapet skal ta opp til prosjektet. Det er venta eit lånebehov på om lag 205 mill kr. Det er vidare lagt til grunn at selskapet kan verta ansvarleg for overskridingar på inn til 10 %. Dette inneber i so fall ei oppjustering av lånebehovet og selskapet ber difor om garanti for inntil 240 mill kr. Lånebehovet oppstår m.a. fordi innsparte midlar til drift av ferjesambandet først vil verta utbetalt med årlege tilskot etter at brua er bygd. På same måten vil hovudtyngda av bompengeinntektene koma etter at brua er bygd. Det er såleis behov for finansiering i ventetida. Bompengar sitt bidrag til finansieringa av brua er 65,8 mill kr.