Måndag om ei veke startar arbeidet med veg og tunnel gjennom Rullestad. Mesta AS har fått anbodet, og litt vil drype på underentreprenørar. Mesta AS har fått hovudentreprisen på Rullestadparsellen med ein prislapp på 166 millionar kroner. Statens vegvesen sitt produksjonsselskap Mesta hadde liten konkurranse sidan det berre var to av i alt 11 inviterte entreprenørar som gav pris på prosjektet. Mesta skal utføre arbeidet på veg og tunnel. Underentreprenørar blir engasjerte til massetransport. Startar ved Rullestadvatnet Prosjektleiar hos byggherren Statens vegvesen, Odd Sæveraas, opplyser at arbeidet kjem i gang 15. mars. Oppstartmøtet var på torsdag. Hovudinnsatsen blir først i skjeringane langs Rullestadvatnet slik at vi har fast grunn under vegen før vi flyttar på massar, fortel han. Parsellen er seks kilometer, nesten på meteren likt fordelt mellom tunnel og veg i dagen. Tunnelinnslaget ved Rullestad blir om lag 1,5 kilometer oppe i dalføret forbi saga, og tunnelen kjem ut så å seie på slutten av parsellen ved Langebu, om lag 1,5 kilometer ovanfor Skromme. Juli 2006 Anlegget skal vere ferdig til juli 2006, og Mesta har dermed fått over to år på seg. Halvparten av dei 166 millionane skal trafikantane betale direkte gjennom bompengar. Den statlege andelen blir finansiert fortløpande, og det var sett av litt pengar i 2003. Men som kjent vart ikkje prosjekteringa ferdig på grunn av uventa grunntilhøve langs Rullestadvatnet. Lokale entreprenørar er med i konkurransen om massetransporten, men prosjektleiar Bjarne Løne i Mesta er ikkje klar til å gå ut med kven som har fått desse oppdraga. Interessa for å få desse jobbane er stor, og entreprenørar har ringt oss ned frå fleire fylke, fortel Løne.
