Gjennomslag i Rotsethorntunnelen

Med bygginga av Rotsethorntunnelen blir ei av dei mest rasutsette vegstrekningane i fylket erstatta med ny og rassikker veg, heiter det i ei pressemelding frå Statens vegvesen. Det er ordførar Knut Bere som får det ærefulle oppdraget med å fyre av den siste salva torsdag 4. september 2003 kl. 1300. God framdrift på arbeidet og lokal forskottering av midlar gjer at tunnelen allereie frå 19. desember i år kan takast i bruk til kolonnekjøring når eksisterande veg er stengt på grunn av ras eller rasfare. I juni neste år er det klart for offisiell opning og rassikker veg langs Austefjorden. I tida fram til opninga blir det utført etterarbeid i tunnelen med bl.a. vegbygging, vannsikring, drenering, dekkelegging, elektroarbeid. Tunnelen får ei vegbreidd på 6,5 meter og blir utrusta med naudsamband, brannskap og kabel for radio. Første salve på den 2 032 meter lange tunnelen ble avfyrt 5. desember 2002, og det har vore ei gjennomsnittleg inndrift på 63 meter per veke. Gjennomslaget går inn i den eksisterande Rotsethorntunnelen, slik at ny og gammal tunnel blir å rekne som ein tunnel med ei lengd 3 962 meter. Det er brukt 260 000 kg slurry (sprengstoff) til å sprengje dei 419 salvene i tunnelen, og det er kjørt ut 140 800 kubikkmeter fast fjell som er vidaretransportert til asfaltverket i Geitvika. Tunnelen er sikra med 8 000 fjellboltar og 3 000 kubikkmeter sprøytebetong. Mesta as er entreprenør for tunnelbygginga. Totalkostnadene for prosjektet er 114 mill. kr og prosjektet skal finansierast over statsbudsjettet. For å kunne forsere utbygginga har Ørsta og Volda kommunar gjort vedtak om å forskottere 25 mill. kr i 2003 mot refusjon i 2006. Møre og Romsdal fylkeskommune har tilsvarande gjort vedtak om å forskottere inntil 50 mill. kr i 2003 mot refusjon i 2004.