Konsesjon til Måren kraftverk i Høyanger står ved lag

Publisert 30.06.2007 10:31

Olje- og energidepartementet har avslått klagene på NVEs løyve til bygging av Måren kraftverk i Høyanger kommune i Sogn og Fjordane. BKK Produksjon AS kan no gå i gang med utbygginga.

-Det er eit viktig mål å få til utbygging av småkraftverk basert på ein miljøvennlig utnytting. Denne utbygginga gir eit godt bidrag til kraftoppdekkinga og sørgjer for verdiskaping og næringsutvikling i distrikta, seier olje- og energiminister Odd Roger Enoksen.

Kraftverket vil ha ein årleg produksjon på rundt 28 GWh. Produksjonen svarer til energiforbruket til om lag 1400 husstandar. Utbygginga er eit samarbeid mellom Høyanger kommune som eig fallrettigheta og BKK Produksjon AS, der BKK står som søkjar, utbyggar og eigar av kraftverket. Av omsyn til landskapsoppleving og biologisk mangfald er det sett krav om minstevassføring på 300 liter/sekund om sommaren og 140 liter/sekund om vinteren.