Løyve til Lappvik kraftverk i Narvik

Publisert 29.06.2007 08:37

NVE har gjeve Nordkraft AS løyve til å bygge Lappvik kraftverk i Narvik kommune i Nordland. Kraftverket vil få ein årleg produksjon på om lag 5,9 GWh, noko som tilsvarar straumbruken til rundt 300 husstandar.

Kraftverket vil nytte eit fall på 300 m i Lappvikelva i Sørskjomen. Vatnet vil gå i eit delvis nedgravd røyr frå inntaket til kraftstasjonen nede ved riksvegen.

Utbygginga vil redusere vassføringa i Lappvikelva. Av omsyn til biologien i og langs vassdraget er det sett krav om ei minstevassføring på 20 l/s året rundt. Med desse vilkåra meiner NVE at almenne interesser er sikra, samstundes som ei utbygging vil gje ein viss auke i kraftproduksjonen.