NVE har vedteke at det berre kan gjevast løyve til eit av dei tre nemnde kraftverka som no har vore planlagt i Austefjordområdet. I alle tre sakene har NVE lagt avgjerande vekt på omsynet til fosselandskapet i Austefjorden der det allereie er bygd ut fleire elvar. For Botnaelva er det og lagt stor vekt på omsynet til biologisk mangfald i og langs vassdraget. Ei utbygging av Skinvikelva med inntak nedanfor Skinvikfossen, er med dei fastsette avbøtande tiltaka etter NVEs syn akseptabel i høve til allmenne interesser. Det planlagde kraftverket vil nytte eit fall på ca. 95 meter over ei strekning på omlag 750 meter. Årleg produksjon vert omlag 3 GWh noko som tilsvarar straumbruken til rundt 150 husstander. Det er fastsett ei minstevassføring på 100 liter i sekundet om sommaren, og 40 liter i sekundet resten av året. NVE meiner at sjølv med avbøtande tiltak vil ei utbygging av Aurstadelva og Botnaelva ha større ulemper enn fordelar og avslår difor desse søknadene.
- Nøkkelord
- Import