Lille frøen AS vant Høgskulen i Sogn og Fjordane

Ei gruppe leidd av Arkitektgruppen lille frøen AS, Oslo, har vunne plan- og designkonkurransen om å teikne det nye sentralbygget for Høgskulen i Sogn og Fjordane (HSF) i Sogndal.

Under mottoet Missing Link har prosjektet skilt seg klårt ut ved å leggje til det manglande leddet som kan binde saman bygningane på høgskulen. Høgskulen i Sogn og Fjordane held i dag til i fleire bygningar spreidde omkring i Sogndal. Det har lenge vore eit ønske om å samla verksemda på Fosshaugane campus, og det nye sentralbygget vil bli eit viktig bindeledd mellom dei tre andre bygningane som ligg her. Høgdeskilnaden på 25 meter har kanskje vore den største utfordringa for prosjekta, men Arkitektgruppen lille frøen AS har greidd å forvandle problemet til eit potensial som dei har utnytta til fulle. Det vertikale sentralrommet blir det samlande elementet i bygget. Hovudtrapp og heissamband gjer at alle må innom her. Det er etter måten kort veg til dei ulike funksjonane, og som vrimleareal har rommet gode proporsjonar. Store glasflater vil føre naturen og det store landskapet ikring inn i bygningen. Juryen meiner dette utkastet òg har ei framifrå planløysing og organisering. Arkitekten har knytt Stadionbygget på øvre nivå til Fossbygget på nedre, slik at det utgjer ein heilskap. Det nye sentralbygget kjem samstundes til å utgjere ein fjerde vegg rundt eit sentralt tun på campus, og det blir eit samanhengande grøntområde mellom øvre og nedre nivå. Vinnarutkastet tilfredsstiller òg ønsket om å skape sosiale møteplassar utan at den grøne skråninga mistar særpreget sitt. Juryen har hatt eit spennande arbeid og meiner arkitektkonkurransen har vore svært vellukka. Det har vore viktig å få innspel frå dei ulike brukargruppene på Høgskulen undervegs i vurderinga. Rektor Johs. Thaule og direktør Hans Jørgen Binningsbø ved Høgskulen i Sogn og Fjordane har vore medlemmer i juryen. Dei er godt nøgde med vinnarutkastet og meiner at det er eit godt og tenleg bygg som vil markere Høgskulen på ein positiv måte. Statsbygg har gjennomført den avgrensa plan- og designkonkurransen på oppdrag frå Kunnskapsdepartementet (tidlegare Utdannings- og forskingsdepartementet). I alt 38 arkitektkontor ønskte å delta, og fem vart valde ut til å gå vidare i ei avgrensa konkurranse. Forprosjektet skal vere ferdig før året er omme, og målet er byggjestart i slutten av 2008. Brutto arealramme for bygget blir på 7600 m2, og den estimerte entreprisekostnaden er på nærare 140 millionar kroner.