Kårstø best i verda

- I framtida vil folk frå heile verda valfarta til Kårstø for å sjå på verdas første grøne gasskraftverk i stor skala, sier Jens Stoltenberg til Stavanger Aftenblad.

Statsminister Jens Stoltenberg tok i bruk både fagre og grøne ord for å lovprisa gasskraftverket på Kårstø på fredag. Gasskraftverket, som har vore planlagt, etterlyst, utskjelt og omstridd i meir enn 20 år, er saman med eit planlagt reinseanlegg for CO2 snudd til eit klimapolitisk føredøme. Saman med miljøvernminister Helen Bjørnøy og olje- og energiminister Odd Roger Enoksen var statsministeren i går på gasskrafttomta og konstaterte at anleggsarbeidet er i gang. Miljøvernminister Helen Bjørnøy takka miljørørsla for deira mangeårige innsats som nå har ført fram til startskotet for bygging av gasskraftverk med CO2-reinseanlegg. - Eg er stolt over å vera med i ei slik miljø-regjering, sa Bjørnøy. Olje- og energiminister Odd Roger Enoksen gratulerte miljørørsla med resultatet. Han minna samtidig om at han i 2000 var med i ei regjering som gjekk av i protest mot bygging av eit konvensjonelt gasskraftverk på Kårstø. Statsministeren handhelsa på ungdommane som var møtt fram for å demonstrera utanfor hovudinngangen til Kårstø i går. Stoltenberg vedgjekk at han, då han var på Kårstø som olje- og energiminister i 1995, uttalte at eit konvensjonelt gasskraftverk ville vera realisert i løpet av to- tre år. Gassco-sjef Brian Bjordal, som har fått ansvaret for utgreiing av mange viktige spørsmål før bygging av CO2-reinseanlegget på Kårstø, vil invitera Bellona og andre miljøorganisasjonar med på laget. - Alle gode krefter må nå dra i same lei, sa Bjordal. Dette var også dagen då Bellona kunne rosa regjeringa. - Me har stor respekt for regjeringa som tok sjansen i Soria Moria-fråsegna på bygging av CO2-renseanlegg, seier Marius Holm i Bellona. - Det blir nå satsa mange stader rundt i verda på utvikling av CO2-reinsing og -oppsamling. Men Norge har ein eineståande sjanse til å lukkast først i stor skala, seier Holm. Kven tar rekninga? Men mange spørsmål står utan svar. Kven skal betala gildet, og kor dyrt blir det? Statsmisteren kunne ikkje gi svar på det, men sa at staten er villig til å ta risiko: - Men samtidig er målet at oppsamla CO2 skal bli ein verdfull gass som oljeindustrien på sokkelen vil betala for å bruka til å henta opp meir olje med. Utslepp av CO2 vil i alle høve kosta i kvoteregimet til EU, seier Stoltenberg, til Aftenbladet. Mer: http://web3.aftenbladet.no/lokalt/article249249.ece For flere nyheter om energi: www.energisk.no