Avdelingsdirektør vegavdeling Hordaland

I Statens vegvesen Region vest søkjer vi ny leiar til vegavdeling Hordaland. Avdelinga har ansvar for alle riks- og fylkesvegar i Hordaland fylke og har totalt ca 190 medarbeidarar fordelt på fem seksjonar, to investeringsprosjekt og ein stab. For 2017 har avdelinga ein budsjettramme på ca.3,1 mrd kr.

Avdelinga ivaretek ansvaret for vegane gjennom å planlegge og gjennomføre utbyggings-, vedlikehald – og driftstiltak, samt forvaltningsoppgåver der vi gir m.a uttale til arealplanar, eigedomssaker og veg – og skiltforvaltning. I tillegg har avdelinga ansvar for å utarbeide grunnlag for etaten sine innspel til handlingsplanar, langtidsbudsjett og årlege budsjett for riks- og fylkesvegar.

Viktigaste arbeidsoppgåver

Avdelinga har eit høgt aktivitets- og kompetansenivå, og som leiar har du det overordna ansvaret for dagleg leiing, styring og utvikling av avdelinga. Dette inneber budsjett- og resultatansvar for heile avdelinga og direkte personalansvar for totalt 12 medarbeidarar. Stillinga rapporterer til regionvegsjefen og du inngår også i hans leiargruppe. Du er såleis aktivt med i leiing og utvikling av heile regionen. Stillinga inneber ein del reiseaktivitet. Kontorstad vil vere Bergen.

Stillinga inneber også mykje kontakt og samarbeid med interne einingar i Vegvesenet og gjennom sams vegadministrasjon med Fylkeskommunen er dei og kommunane nære samarbeidspartnarar. Eit slikt tett samarbeid krev at du har evne til å kommunisere, samhandle og skape gode relasjonar med ulike nivå.

Kvalifikasjonar

Du har utdanning frå universitet eller høgskule, min. 4 år, fortrinnsvis innan leiing, økonomi eller teknisk fagretning. Vi krev fleirårig leiarerfaring frå privat og/eller offentleg verksemd. I tillegg bør du ha god forståing for og kjennskap til offentlig forvaltning, polititiske prosessar og eit bredt samfunnsengasjement.

For deg som har fleire års erfaring med leiing, samt gode personlege føresetnader for stillinga, kan kravet til høgare utdanning fråvikast. Stillinga føreset sikkerheitsklarering eller at slik kan gjevast.

Dersom du har teke heile eller deler av utdanninga di i utlandet, må den vere godkjend av NOKUT( www.nokut.no).

Forventningar

Å leie og vidareutvikle vegavdelinga vår inn i framtida med det spenn av oppgåver og faglege utfordringar som skal løysast, t.d innan by- og miljøproblematikk, vil vere krevjande og særs spennande. Du må evne å ha fokus på og eit heilheitleg perspektiv på alle ansvarsområda til avdelinga. Du som leiar må også vere utviklingsorientert og omstillingsdyktig i høve til organisasjon og samfunn.

I vår arbeidskvardag legg vi stor vekt på våre verdiar: inkluderande, profesjonell og framtidsretta. Vi ynskjer difor leiarar som:

• er synlege og gode rollemodellar for sine medarbeidarar
• viser handlekraft og gjennomføringsevne
• er resultatorienterte og definerer mål og retning for avdelinga
• set krav, er tydeleg og gjer klare tilbakemeldingar på arbeid og åtferd

Stort engasjement, mykje ansvar og fagleg utvikling

Som tilsett i Statens vegvesen blir du ein del av eit engasjert og tungt fagmiljø som tenkjer nytt, deler kunnskap og jobbar tett saman. Du påverkar samfunnsutviklinga, og du får bidra til framtidsretta løysingar på fagfeltet ditt. Vi gir deg viktige oppgåver med mykje ansvar, og vi treng medarbeidarar som ønskjer å utvikle seg i takt med nye utfordringar.

Medarbeidarane våre fortel om spennande arbeidskvardagar med god balanse mellom arbeid og fritid.

Vi tilbyr også desse goda:

• introduksjonsprogram og fadderordning
• eigne leiarutviklingsprogram
• fleksitid og gode ordningar for avspasering
• pensjonsordning og høve til å få lån i Statens pensjonskasse
• etatsskular og gode høve for fagleg påfyll

Løna blir avtalt nærare i samsvar med lønnspolitikken vår.

Statens vegvesen skal vere prega av mangfald, og dei tilsette hos oss skal spegle befolkninga. Vi legg vekt på å leggje arbeidsforholda til rette dersom du har behov for det.

Vi gjer merksam på at søkjarlista kan verte offentleggjord, sjølv om du har bedt om unntak frå denne. Du vil i så fall verte varsla.

Kontaktpersonar:
Regionvegsjef Helge Eidsnes
mob: +47 95894100

Søk stilling