Bygg- og avtaleforvaltning søker ny kontorleiar i Oslo

Statens vegvesen søker kontorleiar til nyetablert kontor. Kontor for bygg- og avtaleforvaltning er knytt til Seksjon for anskaffelser, HR og administrative tjenester som er ein del av HR- og administrasjonsavdelingen i Vegdirektoratet. Stillinga inngår i seksjonen sitt leiarteam med fire andre kontorleiarar i tillegg til seksjonsleiar. Du vil rapportere til seksjonsleiar, og ha personalansvar for fem medarbeidarar.

Vi søker engasjert og handlekraftig leiar til nyoppretta, fast stilling i Vegdirektoratet. Forvaltning av bygg og eigedom og generell avtaleforvaltning er hovudarbeidsområda.

Ansvarsområda til kontoret

• Vareta det faglege ansvaret for anskaffingar, forvaltninga, drift og vedlikehald av Statens vegvesen sin portefølje av eigde og leigde bygg og eigedommar
• Forbetre eigedomsporteføljen i samarbeid med driftseiningane som bruker og har budsjettansvar for bygga
• Vareta eigarskapet til etaten sine rammeavtalar innan m.a. køyretøy, arbeidstøy, møblar og kontor- og datarekvisita og i tillegg finne løysingar og inngå avtalar som bidrar til å effektivisere etaten
• Vareta drift og utvikling av etaten si systemløysing for beredskap og krisehandtering, VegCIM, og dermed bidra til å styrke etaten sin beredskap

Ansvar og arbeidsoppgåver som ligg til stillinga

Som leiar vil du få ansvaret for å leie oppfølginga av mål, planar og resultat, og dessutan sørge for kompetansebygging og gi fagleg støtte. Du vil også få ansvaret for å effektivisere gjennom å innføre enklare, meir kostnadseffektive - og standardiserte metodar. Vidare vil du måtte leie og delta i ulike prosjekt.

Vi ønsker oss ein leiar som

• er sjølvstendig, engasjert og har evne til å arbeide strukturert
• tar initiativ og ansvar
• samarbeider og kommuniserer godt med andre
• har fokus på gjennomføring og god kvalitet i leveransane
• er flink til å engasjere og utvikle medarbeidarane sine

Kvalifikasjonskrav

Du må ha utdanning frå universitet eller høgskule, minimum 3 år, innan relevante fagområde. Vidare er det eit krav at du har solid erfaring frå fagleg og operativ leiing av eigedomsverksemd. Det er ein fordel om du i tillegg har erfaring frå dei andre arbeidsområda til kontoret. For kandidatar med omfattande og relevant erfaring, og sterk og allsidig forståing for dei aktuelle fagområda kan kravet til utdanning fråvikast.

Erfaring frå personalleiing og relevant fagleg koordinering frå offentleg verksemd er ønskeleg. Du må ha god skriftleg og munnleg framstillingsevne på norsk.

Dersom du har tatt heile eller delar av utdanninga di i utlandet, rår vi deg til å skaffe ei autorisert omsetting av papira dine og godkjenning frå NOKUT ( www.nokut.no).

Stort engasjement, gode strukturar og fagleg utvikling

Som tilsett i Statens vegvesen blir du ein del av eit engasjert og tungt fagmiljø som tenker nytt, deler kunnskap og jobbar tett saman. Du påverkar samfunnsutviklinga, og du får bidra til framtidas løysingar på fagfeltet ditt. Vi ser etter trygge leiarar som har evna til å leie dyktige fagfolk på ein tydeleg måte. Vi ønsker at du skal finne balansen mellom operativt og strategisk arbeid, mellom fag og forvaltning og mellom arbeid og fritid – både for medarbeidarane dine og deg sjølv.

Vi kan tilby:

• Spennande arbeidsoppgåver i ein etat i stadig utvikling
• Eigne leiarutviklingsprogram
• Fleksibel arbeidstid og gode velferdsordningar
• Godt arbeidsmiljø i moderne og lyse lokale på Bryn i Oslo med gode høve til å nytte offentleg kommunikasjon
• Pensjonsordning og høve til å få lån i Statens pensjonskasse
• Etatsskular og gode høve til fagleg påfyll

For meir informasjon om stillinga, ta kontakt med leiar for Seksjon for Anskaffelser, HR og administrative tjenester Leif Bruaas, 955 27 207.

Statens vegvesen jobbar for likestilling, og vi vil at arbeidsstyrken i størst mogleg grad skal spegle mangfaldet i befolkninga. Det er derfor eit mål for oss å oppnå ei balansert alders- og kjønnssamansetning og å rekruttere personar med innvandrarbakgrunn. Vi oppfordrar personar med innvandrarbakgrunn til å søke stillinga.

Vegdirektoratet er ei IA-verksemd. Arbeidsforholda vil bli lagde til rette for medarbeidarar med nedsett funksjonsevne.

Søk på stillinga her