Kommunikasjonsrådgjevar

Statens vegvesen arbeider for at gåande, syklande, køyrande og kollektivreisande skal komme trygt fram. Vi planlegg, bygger, drifter og vedlikeheld riks- og fylkesvegar og har tilsyn med køyretøy og trafikantar. Som vegadministrasjon for fylkeskommunane og staten yter vi fagleg grunnlag for politiske avgjerder og set dei ut i livet. Vi er ein stor samfunnsaktør med over 7000 engasjerte medarbeidarar, med brei kompetanse fordelt på Vegdirektoratet og fem regionar.

Kommunikasjonsstaben i Statens vegvesen Region vest tel 14 medarbeidarar og er blant dei største fagmiljøa for kommunikasjon på Vestlandet. No ser vi etter deg som skal følgje opp det vidare kommunikasjonsarbeidet knytt til satsinga på samferdsel og bymiljø i Bergen. Du som blir tilsett, skal i første omgang jobbe 100 prosent med Bergensprogrammet. Etter kvart vil heile stillinga di ligge til Bymiljøpakke Bergen, som er ei forlenging og vidareutvikling av Bergensprogrammet.
Til grunn for Bergensprogrammet og bymiljøpakken ligg det mål om nullvekst i personbiltrafikken og god framkomst for alle trafikantgrupper, der hovudvekta er på kollektiv, sykkel, gange og næringstransport. Sidan 2002 har det gjennom Bergensprogrammet vorte investert milliardar av kroner i større og mindre samferdselsprosjekt i byen, med Bybanen som det aller største. I åra framover står nye prosjekt for døra som skal gjere transporten meir miljøvennleg og framkomsten betre og sikrare for trafikantane.

Bergensprogrammet er eit samarbeid mellom Hordaland fylkeskommune, Bergen kommune og Statens vegvesen. Dei same tre etatane pluss Jernbaneverket utgjer samarbeidspartane i den kommande bymiljøpakken.

Arbeidsoppgåver

• koordinere kommunikasjonsarbeid på tvers av etatane
• følgje opp gjeldande kommunikasjonsstrategi og etter kvart lage ny
• leie ei faggruppe av kommunikasjonsmedarbeidarar frå dei involverte aktørane
• støtte plan- og byggeprosjekt med å lage kommunikasjonsplanar og gjennomføre kommunikasjonstiltak
• rådgje leiar/medlemmar i faglege og administrative grupper i kommunikasjonsspørsmål
• webredaktør for nettsida bergensprogrammet.no
• utvikle og produsere innhald til trykte og digitale kanalar internt og eksternt
• ta initiativ og bidra til å gjennomføre kampanjar, konferansar og seminar
• mediekontakt og -rådgjeving
• handtere løpande kommunikasjonsoppgåver

Det pågår altså no ein prosess for å vidareføre Bergensprogrammet innanfor rammene av ein kommande bymiljøpakke. Dette kan få innverknad på arbeidsoppgåvene dine.

Kvalifikasjonar
Vi ser etter deg som helst har relevant utdanning på masternivå og god erfaring med både strategisk og operativt kommunikasjonsarbeid. Det er ein fordel at du har kjennskap til og forståing av offentleg forvaltning og politiske prosessar. Du formulerer deg godt både munnleg og skriftleg, og du er flink til å samarbeide og skape tillitsfulle relasjonar. Samtidig må du vere sjølvstendig og strukturert i arbeidet og ha ein vilje til å stå og gå på.

Arbeidsstaden din blir Vegvesenets nye kontorbygg i Nygårdsgaten i Bergen. Løn blir avtala nærmare i samsvar med vår lønspolitikk.

Stort engasjement, mykje ansvar og fagleg utvikling

Som tilsett i Statens vegvesen blir du ein del av eit engasjert og tungt fagmiljø som tenkjer nytt, deler kunnskap og jobbar tett saman. Du påverkar samfunnsutviklinga, og du får bidra til framtidsretta løysingar på fagfeltet ditt. Vi gir deg viktige oppgåver med mykje ansvar, og vi treng medarbeidarar som ønskjer å utvikle seg i takt med nye utfordringar.
Medarbeidarane våre fortel om spennande arbeidskvardagar med god balanse mellom arbeid og fritid.

Vi tilbyr også desse goda:

• introduksjonsprogram og fadderordning
• fleksitid og gode ordningar for avspasering
• pensjonsordning og høve til å få lån i Statens pensjonskasse
• etatsskolar og gode høve for fagleg påfyll

Statens vegvesen skal vere prega av mangfald, og dei tilsette hos oss skal spegle befolkninga. Vi legg vekt på å leggje arbeidsforholda til rette dersom du har behov for det.
Dersom du har teke heile eller delar av utdanninga di i utlandet, ber vi om ei autorisert oversetjing av papira dine og ei godkjenning frå NOKUT (www.nokut.no).
Vi gjer merksam på at søkjarlista kan verte offentleggjord, sjølv om du har bedt om unntak frå denne. Du vil i så fall verte varsla.

SØK HER

Kontaktpersonar:
Bernt Flekke
mob: 97549831