Prosjektleiar for planlegging av Bussvei 2020-prosjektet

Bussvei 2020 er den store kollektivsatsinga som byregionen på Nord-Jæren skal gjennomføre dei neste åra. Fram til prosjektet er ferdig i juni 2021 skal vi planlegge og bygge til saman over 40 kilometer med bussfelt, og vi søker ein dyktig prosjektleiar til å styre og koordinere dette prosjektet.

Prosjektet skal også gi gode løysingar for dei som går og syklar. Dette er i tråd med ei overordna målsetjing om at all vekst i persontransport i byområdet skal skje gjennom kollektiv, gange og sykkel. Bussvei 2020 knyt saman viktige regionale målpunkt som Risavika, Stavanger sentrum, Forus og Sandnes sentrum.

Bussvei 2020-prosjektet blir leia av Rogaland fylkeskommune, som har ansvar for mellom anna marknadsføring, profilering og innkjøp av nytt bussmateriell. Statens vegvesen har fått ansvaret for planlegging og bygging av infrastrukturen i prosjektet. Med denne ansvarsdelinga er eit tett og godt samarbeid med Rogaland fylkeskommune svært viktig.

Stillinga blir knytt til Plan og forvaltningsseksjonen i Vegavdeling Rogaland, som mellom anna har ansvar for planlegging- og investeringsprosjekt på riks- og fylkesvegnettet i Rogaland.

Ansvar og arbeidsoppgåver
Bussvei 2020 består av fleire strekningar; delar av prosjektet er ferdig bygd, noko blir bygd no, medan andre delar er under planlegging. Som prosjektleiar vil du få ansvar for å styre og koordinere prosjektet, og du vil ha ei nøkkelrolle for å sikre at dette blir ferdig til juni 2021.

Du skal leie eit internt prosjektteam på tvers av fleire avdelingar i Statens vegvesen. Du skal samarbeide tett med fagpersonar for planlegging og utbygging. Personalansvar for fag/team-medarbeidarane er hos seksjonsleiarane.

Som prosjektleiar vi du i tillegg få ansvar for:
• Å leie og koordinere ulike eksterne samarbeidsgrupper ved behov
• Kontakt og tett dialog med dei involverte partane, for å sikre nødvendig framdrift og kvalitet i plan- og prosjekteringsfasen
• Sikre koordinering med prosjektansvarleg i Rogaland fylkeskommune
• Rapportere til seksjonsleiar Plan og forvaltning og samferdslessjefen i Rogaland fylkeskommune

Kvalifikasjonar
Vi ser etter deg som har høgare utdanning, min. 3 år, og erfaring frå prosjektleiing og prosesstyring. Dersom du har sterk og allsidig praksis eller etterutdanning og gode personlege føresetnader for stillinga, kan vi sjå bort frå utdanningskravet. Dersom du har teke heile eller delar av utdanninga di i utlandet, ber vi om ei autorisert oversetjing av papira dine og ei godkjenning frå NOKUT ( www.nokut.no).

Stillinga er utfordrande og stiller høge krav til prosjektstyrings- og leiarkompetanse og samarbeid med administrative og politiske organ på alle nivå. Du bør ha god kunnskap og erfaring frå samfunns- og transportplanlegging.

Som prosjektleiar er det viktig at du kommuniserer og samhandlar godt, ser løysingar og viser handlekraft gjennom fagleg styrke. Du er analytisk, sjølvstendig og god til å samarbeide med andre. Evne til å skape eit godt arbeidsmiljø er viktig for denne stillinga.

Stort engasjement, mykje ansvar og fagleg utvikling
Som tilsett i Statens vegvesen blir du ein del av eit engasjert og tungt fagmiljø som tenkjer nytt, deler kunnskap og jobbar tett saman. Du påverkar samfunnsutviklinga, og du får bidra til framtidsretta løysingar på fagfeltet ditt. Vi gir deg viktige oppgåver med mykje ansvar, og vi treng medarbeidarar som ønskjer å utvikle seg i takt med nye utfordringar.

Medarbeidarane våre fortel om spennande arbeidskvardagar med god balanse mellom arbeid og fritid.

Vi tilbyr òg desse goda:
• introduksjonsprogram og fadderordning
• fleksitid og gode ordningar for avspasering
• pensjonsordning og høve til å få lån i Statens pensjonskasse
• etatsskolar og høve til fagleg påfyll

Lønna blir avtalt nærare i samsvar med lønnspolitikken vår.

Statens vegvesen skal vere prega av mangfald, og dei tilsette hos oss skal spegle befolkninga. Vi legg vekt på å leggje arbeidsforholda til rette dersom du har behov for det.
Vi gjer merksam på at søkjarlista kan verte offentleggjord, sjølv om du har bedt om unntak frå denne. Du vil i så fall verte varsla.

Søk her

Kontaktpersonar:

Lisa Garpe

mob: +47 91323718