Åtte vil bygge kryss i Ølen

Åtte entreprenørar vil ha jobben med å bygge nytt kryss mellom E134 og fylkesveg 514 i Ølen. Bjarne Nordtveit AS har lågast pris med 4,795 millionar kroner.

Dei andre tilbydarane er:

• Ottar Skjold Maskin AS 5,220 millionar kroner

• Vassbakk & Stol AS, 5,253 millionar kroner

• Brødrene Flatebø AS 5,344 millionar kroner

• Risa AS 5,499 millionar kroner

• MTM Anlegg AS 6,491 millionar kroner

• Berthelsen & Garpestad AS 7,416 millionar kroner

• Brødrene Selvik AS 7,803 millionar kroner

– Flott at så mange meiner prosjektet er interessant, men prisane er litt høgare enn venta, seier prosjektleiar Asbjørn Opedal i Statens vegvesen til vegvesen.no.

Byrjar snart

No skal Statens vegvesen gå gjennom tilboda og kontrollrekne, før kontrakten blir signert. Går alt etter planen er innstillinga klar innan 1. september. Det krev at Vindafjord kommune godkjenner byggesøknaden.

– Byggestart blir i midten av september, fortel Opedal.

Ny fylkesveg

Arbeidet består av å bygge nytt kryss, om lag 200 meter ny fylkesveg 514. Vidare skal det byggast to avkøyringar, entreprenøren må finne deponi til 13.500 kubikk med massar. I tillegg kjem grøfter, gatelys, oppbygging av vegen og 460 kvadratmeter med natursteinsmur.