May Balkøys minnepris til Eid

Eid har utvikla ein unik modell for kulturbasert stadutvikling gjennom langsiktig samarbeid mellom eldsjeler, kommune, fylkeskommune og andre aktørar. Slik har ein i Eid sidan 1995 mellom anna etablert Noregs einaste operahus utanfor Oslo, ein av Noregs største rockefestivalar, eige operakompani, rockeskule, dugnadsdrivne kulturhus og utandørsarena og ein unik modell for pedagogisk entreprenørskap og samarbeid kultur/utdanning i vidaregåande skule. Resultata ein har oppnådd i Eid har vekt merksemd nasjonalt og internasjonalt.

Det er Statsbygg som deler ut prisen på Krysskonferansen. Prisen skal stimulere til ein kulturbasert by- og stadutviklingspraksis. Det er fjerde gongen ein slik pris blir delt ut. Kryssprisen er i år døypt "May Balkøys minnepris" for å heidre initiativtakaren til kryss.no, Krysskonferansen og Kryssprisen. Tidlegare vinnarar er Stavanger, Skien og Porsgrunn.

Juryen, som er sett saman av Statsbygg og redaksjonsrådet for kryss.no, seier dette om vinnaren:

Prisvinnaren i år er historia om eit lokalsamfunn som tenkjer heilskapleg om kultur og stadsutvikling, der ordet "umogleg" ikkje finst, og som har vore flinke til å ignorere jantelova. Bak dei imponerande resultata i Eid ligg brei mobilisering på kryss og tvers. Dette er oppsiktsvekkjande resultat i ein landkommune med om lag 6000 innbyggjarar spreidde mellom fjord og fjell, og knapt 3000 av desse i kommunesentret Nordfjordeid.

Eid kommune er òg deltakar i "Kultur for samfunnsutvikling", det toårige pilotprosjektet Sogn og Fjordane fylkeskommune har for kulturplanlegging.

Statsbygg ønskjer å heidre ein aktør som går føre og viser kva moglegheiter som ligg i ein kulturbasert innfallsvinkel til utvikling. Vi håper denne prisen kan inspirere til å vidareføre det flotte arbeidet og stimulere andre til å våge å satse på kulturbasert stadutvikling.

Prisen er eit foredrag av ein av talarane frå Krysskonferansane, utvald i samarbeid mellom Eid kommune og Statsbygg.

Ordfører Alfred Bjørlo tok imot prisen saman med Arnt Ivar Naustdal, festivalsjef for Malakoff Rockfestival.

- Denne prisen går til heile lokalsamfunnet. Vi er stolte og glade for at den unike, langsiktige satsinga på kulturbasert stadsutvikling i Eid blir lagt merke til og heidra nasjonalt, seier ordførar i Eid, Alfred Bjørlo. - Eg er særleg glad for at Statsbygg trekker fram lagspelet mellom eldsjeler, kommune, fylke og ein enorm dugnadsinnsats i lokalmiljøet. Det å løfte kvarandre og spele på lag, gjer alle betre. Då kan ein få til utrulege resultat.

Les meir om kulturplanleggjing kryss.no.