Viktig målpassering i Hardanger

For brutrafikken og for folk på Bu i Eidfjord og Ullensvang kommunar har det vore viktig at denne vegen no får to køyrefelt og dessutan gang- og sykkelveg over Bu-platået.

Drøye seks veker etter opninga av Hardangerbrua var det ein meir smålåten samling av ordførarar, entreprenørar, byggherremannskap og naboar som var møtt fram på Bu føremiddagen 1.oktober. Opninga skjedde presis på den avtalte sluttdatoen med entreprenør E.Opedal & Sønner, som no har hovedkontor på Voss, melder vegvesen.no.

Kl. 10.54 kunne regionvegsjef Helge Eidsnes føreta den offisielle snorklippinga, assistert av ordførarane Solfrid Borge i Ullensvang og Johan Anved Tveit i Eidfjord.

Opninga av første byggjesteg på det som fram til 17.august i år heitte rv. 13 Bu-Brimnes, skjedde sommaren 2010, strekninga Brimnes-Kobbestille. Det sto no att å markera fullføringa av byggjesteg 2 og 3, mellom Kobbestille og Hardangerbrua.

Dei to første byggjestega har hatt ein hovudfunksjon for rassikring i bratt lende. Tredje byggjesteg har vore mellom Bugjelet og enden (og starten) på bruprosjektet på Bu. Her er det bygt ny to felts veg dels med fjellsprenging, høg mur og ny veg over myr, samt 2 km med gang- og sykkelveg.