NVE gjev konsesjon til bygging av Sundal kraftverk

Publisert 31.08.2005 14:15

NVE gjev konsesjon til Sundal kraftverk AS til overføring av Haraldedalselva til Sundalselva og til å byggje Sundal kraftverk i Volda kommune. Kraftverket vert bygd utan reguleringsmagasin og gjev ein årleg produksjon på 11,2 GWh. Dette vil gje straum til om lag 550 husstandar.

Haraldedalselva vil bli ført over til Sundalselva via ei ca. 950 m lang røyrgate som skal gravast ned i ein ny skogsbilveg. Kraftverket vil nytte eit fall på 265 m over ei strekning på om lag 1400 m. Kraftstasjonen vert plassert rett nedanfor fossen der Haraldedalselva og Sundalselva møtast. Utbygginga vil føre til at Haraldedalselva og Sundalselva får redusert vassføring mellom inntaka og kraftstasjonen. Av omsyn til naturmiljøet vert det ei minstevassføring om sumaren på 14 l/s i Haraldedalselva og 100 l/s i Sundalselva. Med desse vilkåra meiner NVE at utbygginga er miljømessig akseptabel. NVE si samla vurdering er at føremonene ved utbygginga er større enn ulempene.